“చుట్టూ పక్కల చూడరా చిన్న వాడా, చుక్కల్లో చూపు చిక్కుకున్న వాడా! (2)
కళ్ళ ముందు కటిక నిజం, కానలేని గుడ్డి జపం
సాధించదు యే పరమార్ధం, బ్రతుకును కానీయకు వ్యర్ధం (2)” || చుట్టూ పక్కల ||

“స్వర్గాలను అందుకొనాలని వడిగా గుడి మెట్లెక్కేవూ
సాటి మనిషి వేదన చూస్తూ జాలి లేని శిలవైనావు”

“కరుణను మరిపించేదా చదువు సంస్కారం అంటే
గుండె బండగా మార్చేదా సంప్రదయమంటే
కరుణను మరిపించేదా చదువు సంస్కారం అంటే
గుండె బండగా మార్చేదా సంప్రదయమంటే” || చుట్టూ పక్కల ||

“నువ్వు తినే ప్రతి ఒక మెతుకు ఈ సంఘం పండించిందీ
గర్వించే ఈ నీ బ్రతుకు ఈ సమాజమే మలిచింది”

“ఋణం తీర్చు తరుణం వస్తే తప్పించుకు పోతున్నావా!
తెప్ప తగలబెట్టేస్తావా? యేరు దాటగానే!
ఋణం తీర్చు తరుణం వస్తే తప్పించుకు పోతున్నావా!
తెప్ప తగలబెట్టేస్తావా? యేరు దాటగానే!”

“చుట్టూ పక్కల చూడరా చిన్న వాడా, చుక్కల్లో చూపు చిక్కుకున్న వాడా!
కళ్ళ ముందు కటిక నిజం, కానలేని గుడ్డి జపం
సాధించదు యే పరమార్ధం, బ్రతుకును కానీయకు వ్యర్ధం” || చుట్టూ పక్కల ||

ఈ పాట “రుద్రవీణ” చిత్రం లోనిది
రాసిన వారు: “సిరివెన్నెల” (చెంబోలు) సీతా రామ శాస్త్రి
పాడిన వారు: కె. జె. యేసుదాస్
సంగీతం సమ కూర్చినది: ఇళయరాజా

“మౌనంగానే ఎదగమని మొక్క నీకు చెబుతుంది
ఎదిగిన కొద్దీ ఒదగమని అర్థమందులో ఉంది
అపజయాలు కలిగిన చోటే గెలుపు పిలుపు వినిపిస్తుంది
ఆకులన్ని రాలిన చోటే కొత్త చిగురు కనిపిస్తుంది” || మౌనంగానే ||

పై పల్లవిలో అర్థం
“అపజయాలన్నీ వేసవి మండుటెండలో ఎండుటాకులనుకుంటే
వసంతం చిగురులు వేయిస్తూ విజయ బావుటాలు ఎగురవేయిస్తుంది.”
అని కూడ చెప్పుకోవచ్చు.

చరణం 1:

” దూరమెంతో ఉందని దిగులు పడకు నేస్తమా
దరికి చేర్చు దారులు కూడా ఉన్నాయిగా !
భారమెంతో ఉందని బాధ పడకు నేస్తమా
బాధ వెంట నవ్వుల పంట ఉంటుందిగా ! “

” సాగర మథనం మొదలవగానే విషమే వచ్చింది
విసుగే చెందక కృషి చేస్తేనే అమృత మిచ్చింది
అవరోధాల దీవుల్లో ఆనంద నిధి ఉన్నది
కష్టాల వారధి దాటిన వారికి సొంతమౌతుంది
తెలుసుకుంటే సత్యమిది
తలచుకుంటే సాధ్యమిది ” || మౌనంగానే ||

చరణం 2:

” చెమట నీరు చిందగా నుదుటి రాత మార్చుకో
మార్చలేనిదేదీ జగతిలో లేదని గుర్తుంచుకో
పిడికిలే బిగించగా చేతి గీత మార్చుకో
మారిపోని కథలే అవనిలో లేవని గమనించుకో
తోచినట్టుగా అందరి రాతలు బ్రహ్మే రాస్తాడు
నచ్చినట్టుగా నీ తలరాతను నువ్వే రాయాలి
మా ధైర్యాన్ని దర్శించే దైవాలే తలదించగా (2) “

” మా సంకల్పానికి ఆ విధి సైతం చేతులెత్తాలి
అంతులేని చరితలకి ఆది నువ్వు కావాలి ” || మౌనంగానే ||

ఈ పాట “నా ఆటొగ్రాఫ్ స్వీట్ మెమొరీస్” చిత్రం లోనిది
రాసినవారు: చంద్ర బోస్
పాడినవారు: చిత్ర,
సంగీతం సమ కూర్చినది: కీరవాణి

ఈ బ్లాగులో నాకు నచ్చిన కొన్ని పాటలు, మాటలు మీతో పంచుకోవాలని నా ఆకాంక్ష.
నా ప్రచురణలకు మీరు మీ స్పందనలను నాతో పంచుకోగలరని ఆశిస్తూ..

మీ విశ్వ మిత్ర